Oor Ons

Ons streef daarna dat die volgende eienskappe kenmerkend van ons erediens sal wees:

• God is die fokus.
• Die Bybel word uitgelê.
• Die Evangelie word gehoor.
• Doop en nagmaal word bedien.
• Kinders en babas word gehoor.
• Klassieke en kontemporêre musiek word gespeel.
• Elkeen voel tuis – ongeag kleure, klere, ouderdom of sondige geneigdheid – ons almal is radikaal afhanklik van God se genade in die skadu van die Kruis.

Na ‘n kindermoment in die erediens word kinders genooi om die

kinderkerk by te woon. Hier word telkens ‘n verhaal uit die

Kinderbybel gelees en dan word die kinders gelei om op

ouderdomsgepasde wyse met die teks om te gaan.

Groeigrondjies (Kleuterfase tot en met Gr.R): Die kinders luister saam na die Kinderbybel verhaal en kry dan ‘n aktiwiteit om te doen. Ouers van die kinders maak beurte om dit te lei. Kinders jonger as 4 moet asseblief deur ‘n ouer vergesel word.

Woordwortels (Gr.1-6):

Gr. 1 – 2: “Wat het in die storie gebeur?” “Waarvan het jy gehou?” “Wat het jy nie verstaan nie?” Mentor probeer kortliks van toepassing maak op ons lewens.

Gr. 3 – 4: “Wat het in die storie gebeur?” “Waarvan het jy gehou?” “Wat het jy nie verstaan nie?” “Wat het jy van God raakgesien in die verhaal?” “As dit is hoe God is, hoe dink jy moet ons dan wees?”

Gr. 5 – 6: “Wat het in die storie gebeur?” “Waarvan het jy gehou?” “Wat het jy nie verstaan nie?” “Wat het jy van God raakgesien in die verhaal?” “As dit is hoe God is, hoe dink jy moet ons dan wees?” Vrae is op ‘n bladsy getik en daar is plek waar hulle kan invul. Die kinders kry ‘n leêr waarin al hulle werkies gebêre word. Ouers kan na afloop van die kwartaal daarna kyk.

Register word vir elke groep gehou en elke kind wat ten minste 20 sessies deur die jaar bygewoon het ontvang ‘n eremerk op hul Geloofsboom. Kinders wat net 5 of minder sessies gemis het ontvang ‘n spesiale geskenkie aan die einde van die jaar.

Tienertakke (Gr.7-11):

Gr. 7 – 10: Geloofsoordrag is in die eerste plek die verantwoordelikheid van die ouers. Ons bied kategesemateriaal wat ouers weekliks saam met hul kinders kan deurwerk.

Ons het ook in die erediens ‘n kategese-oomblik waarin ons hoofsaaklik op die Belydenisskrifte van die kerk fokus. Tieners kan na afloop van die erediens die register in die raadsaal teken en die teenwoordige mentor enige vrae vra wat tydens die erediens by hul opgekom het. Daar is nie formele kategese na kerk nie.

Elke tiener wat ten minste 25 eredienste (fisies of per stroomdiens) bygewoon het, word aan die einde van die jaar daarvoor erken.

Ons onderneem om maandeliks ‘n sosiale geleentheid vir die tieners aan te bied.

Belydenisjaar:

Enigiemand wat alreeds 25 eredienste bygewoon het en gereed voel daarvoor, kan inskryf vir die Belydenis-program wat bestaan uit ‘n aantal sessies en een konferensie. Na afloop van die kursus doen die persone openbare belydenis van hul geloof tydens ‘n spesiale erediens.

Kerkraad

Die kerkraad van die NG Kerk is die plaaslike regerende liggaam van ‘n gemeente, verantwoordelik vir die geestelike en administratiewe leiding van die gemeente. Parkkruin se kerkraad bestaan uit genomineerde en verkose gemeentelede. Nominasies word na die kerkkantoor gestuur of word per geleentheid tydens eredienste op nominasievorm ingevul, waarna daar tydens ʼn kerkraadsvergadering tyd in gebed en gesprekvoering spandeer sal word, voor persone verkies word tot die kerkraad. ʼn Termyn op die kerkraad duur 2 jaar, met  ʼn moontlikheid van herverkiesing vir nog 2 jaar; 4 Jaar maksimum. Jaarlikse verkiesing van die Voorsitter en Ondervoorsitter vind plaas tydens die November kerkraadsvergadering.

Die kerkraad bepaal, saam met die predikant, hoe die gemeente se roeping uitgeleef word en is verantwoordelik vir die bestuur en die versorging van die geloofsgemeenskap.

Kerkraad Portefeuljes:

• Admin en Skakeling
• Barnabas (Dankfees projekte)
• Dagbestuur
• Diensverhoudinge (HR)
• Droom-projekte
• Erediens & Gebed
• Fasiliteite en Eiendomme
• Finansies
• Gasvryheid
• Jeug
• Jong Volwassenes
• Leraarversorging